2025 – Жұмысшы мамандықтар жылы: еңбек адамының мәртебесін көтеру жолында

Жұмысшы мамандықтары – ел экономикасының негізін құрайтын маңызды сала. Құрылысшылар, дәнекерлеушілер, электриктер, механизаторлар, технологтар, операторлар және басқа да техникалық мамандық иелері қоғамның дамуына айрықша үлес қосады. Индустрия мен өндіріс салаларының дамуы, инфрақұрылымдық жобалардың жүзеге асуы осы мамандардың еңбегіне тікелей байланысты. Бұл бағытта мемлекет жастарды жұмысшы мамандықтарға тарту үшін колледждерге гранттар санын көбейтуді, дуалды оқыту жүйесін кеңейтуді және жаңа кәсіптерді игеруге жағдай жасауды көздеп отыр. Бүгінде техникалық мамандық иелері шетелде де жоғары бағаланады. Қазақстанда жұмысшы мамандарды қолдау мақсатында кәсіптік оқыту бағдарламалары, өндірістік тәжірибе мүмкіндіктері, жеңілдетілген несие және гранттық қолдау шаралары қарастырылуда. 2025 жыл жұмысшы мамандықтарының мәртебесін көтеріп, еңбек адамының қоғамдағы рөлін нығайтуға үлкен мүмкіндік береді.

Бахытгуль Сатбергенова, Атасу ЖББ мектебінің ағылшын тілі пәнінің мұғалімі