Жолдау — ел өркендеуінің басты құжаты. Президент жолдауы – кемел келешек кепілі

Мемлекет басшысы Қасым-Жомарт Тоқаевтың биылғы Жолдауындағы бастамалары, оның бұған дейінгі Жолдауларынан және сайлау алдындағы бағдарламасынан бастау алған реформаларды одан әрі дамытуға арналды. Мемлекет басшысы өз сөзінде азаматтардың тұрмысын жақсартуды көздейтін жүйелі экономикалық өзгерістерге баса назар аударды.
Халқымыздың игілігіне бағытталған басты құжат – оң өзгерістердің бастауы екенін айқындап тұрғандай. Мемлекет басшысы халықтың әлеуметтік ахуалын жақсартып, өмір сапасын арттыратын бірнеше басымдықты атап өтті. Жолдауда әлеуметтік саладағы көптеген күрделі мәселелерге ерекше назар аударылды. Жолдауда елдегі барлық салалар қамтылып, шешу жолдарына нұсқау көрсетілді. Жолдаудың барысында Қасым-Жомарт Кемелұлы қоғамдағы барлық жағдайды бақылап отырғаны байқалды.
Президент Жолдауында қаржының тапшылығынан туындайтын мәселелерді шешудің бірден-бір жолы – шетелдік, отандық инвесторларды ынталандыру екенін айтып, сол арқылы ғана экономикамызды көтеруге болатынын жеткізді. Құқық қорғау саласындағы азаматтарға да нақты тапсырмалар беріп, соның ішінде инвесторлардың келуіне тосқауыл қойылмау керектігін баса айтты. Сонымен қатар, әлеуметтік салаға, әсіресе, балаларды қорғау ісіне айрықша көңіл бөлінді.
Ұлттық қордан балалардың есепшотына қаржы аударуға қатысты заң қабылданды. Балаларды құмар ойынға тартқандар әкімшілік заң бойынша жазаға тартылатын болды.
Кәмелетке толмаған балаларға зорлық-зомбылық көрсеткені үшін берілетін жаза қатаңдады. Балалардың қауіпсіздігін қамтамасыз етуге, әйелдер мен балаларға қатысты қылмыстың алдын алуға арналған заң қабылданды. Жолдауда айтылған халықтың әл-ауқатын көтерудегі маңызды бағыт орта тапты қалыптастыру – тұрақтылықтың кепілі болатындығына сенім мол.

Зейітқазы КЕМАЛОВ,
Ақтау ауылдық округінің қоғам белсендісі, зейнеткер