“Ұлытау” футбол клубының президенті ауданымызға іс-сапармен келді

Биылғы жылы облысымыз үшін футбол ойындары өте қарқынды дамыды. Оған дәлел Ұлытау облысының футболдан құрамасы бірінші лига сатысында турнир кестесі бойынша екінші орынға нық бекіп, ҚПЛ премьер-лигасына жолдама алды. Осы орайда келесі кезекте облысымыздың құрамасын үлкен сындар мен көптеген нәтижелі ойындар күтіп тұр.
Облысымызда футбол спортын жанаша жандандырып, екі жыл ішінде үлкен нәтижеге қол жеткізген “Ұлытау” футбол клубының президенті Талғат Байсуфинов бастаған өкілдер келіп, аудан әкімдігінде кездесу өткізді. Аудан әкімі Қанат Қожықаевтың төрағалығымен өткен басқосуда облыс бойынша футболды дамыту бағдарламасы таныстырылып, футболшыларға кәсіби әдістемелік қолдау көрсетудің маныздылығы түсіндірілді.
Басты мақсат — Ұлытау облысына қарасты ауыл, аудан, қала ойыншылары арасында мықты жас футболшыларды іріктеп, үлкен тұлға ретінде дайындау болмақ. Ауданымызға нақты мақсаттарымен келген Талғат Маруанұлы қуантарлық ұсыныс та білдірді. Айта кетсек, футбол клубының маусым алдындағы оқу-жаттығу жиынына ауданымыздан 3 футболшы таңдап жіберуге мүмкіндігіміз бар екенін жеткізді. Егер аталған футболшылар сол жаттығуда көзге түссе, оларды клубтың екінші командасының құрамына алуға уәделерін берді. Кездесуден кейін “Ұлытау” футбол клубының өкілдері аудан орталығындағы спорт нысандары мен спорттық алаңдарды аралап, тыныс-тіршілігімен танысты.

Қуаныш ТӨЛЕУТАЙ