16 желтоқсан — Қазақстан Республикасының Тәуелсіздік күні Тәуелсіздік бәрінен қымбат

Биыл қастерлі тәуелсіздігімізге 32 жыл толады. Бұл – қайта жаңғырған қазақ мемлекеттігінің, ата-бабаларымыз аңсаған азаттықтың тұғыры нығая түскенін әйгілейтін маңызды белес. Тарих тұрғысынан алғанда, отыз жыл – көзді ашып жұмғандай қас-қағым сәт. Дегенмен, бұл көптеген халықтар үшін қиындығы мен қуанышы, дағдарысы мен дамуы алмасқан тұтас дәуір деуге болады.
Қазақстан Республикасы зайырлы, өз алдына жеке ел болған мемлекет. Қазақтың бақ-берекесі, жөн жоралғысы, дәстүр-салты бәрі-бәрі өзінше тарих. Ал қаймағы бұзылмаған қазағымыздың тәуелсіздігі жайлы тарихы, сол кезеңде болған оқиғасы мүлдем ерекше. Біздің тәуелсіздігімізді, осылай зайырлы мемлекет болып жүргенімізді бірі білсе, бірі білместе шығар…
Алайда білімді әрі тұғырлы қоғамның жас ұрпақтары тәуелсізгіміздің қандай қиыншылықпен, қандай ауыртпашылықпен келгені туралы білетіні анық. 20 ғасырдың соңғы жылдары болатын…
Яғни 1986 жылы бәрі бейқам, енді аяққа тұрып келе жатқан қазағымыздың басына кенеттен қара бұлт үйірілді. Ал бұл сұрапыл соғыстың, келеңсіз қақтығыстардың, қайғылы күндермен, ұйқысыз түндерге тосқауыл болған әрине біздің нар тұлғалы намысшыл жастарымыз (аға мен әпкелеріміз). Атап айтар болсақ Қайрат ағамыздың қайратты рухы, Ербол ағамыздың ерен еңбегі мен ерлігі, Сабина әпкеміздің сағы сынбай соққы беруі, Ләззат әпкеміздің лала гүлі ашылмаса да, лаулап, жануы. Басқа да майданның алдыңғы шебінде жүріп, желтоқсанның желіне жүрексінбей қарсы тұрған жандар жетерлік.
Бұл орны толмас қайғылы оқиғаны өз еліміз ғана емес, басқа мемлекетте естіп, құлақдар болғаны анық. Ал, сол оқиғадан кейін басқа елдерде бізге қаймыға қарап тұрады. Ол әрине, біздің кірпік қақпай, өз Отанында бодан болғысы келмеген, қыршынынан қиылса да қазақ жерін аман сақтап қалуы үшін қымсынбай қарсы тұрған аға-әпкелеріміздің ерен еңбегі мен ауыз толтырып айтар ерлігі. Болашағымыздың жарқын болуы, батыр бабаларымыздың барынша қақпамызға қорған болуы. Тәуелсіздігіміз тұғырлы да мәңгілік болсын!

Яссауи Жұмасейітов,
аудандық жер қатынастары бөлімі ММ-ң бас маманы