«БАЛАУСА» БАЛАБАҚШАСЫ АШЫЛДЫ
Мұқажан Жұмажанов ауылдық округінде мемлекеттік-жекеменшік әріптестік аясында 50 балаға арналған жаңа «Балауса» балабақшасының салтанатты ашылуы өткен болатын. Бұл – ауылдың әлеуметтік дамуына серпін беретін, жас ұрпақты қолдауға бағытталған игілікті бастамалардың бірі.
Заманауи талаптарға толық сай жабдықталған жаңа нысанда кең әрі жарық топ бөлмелері жасақталып, балалардың ой-өрісін, шығармашылық қабілетін дамытуға, ойын арқылы жан-жақты тәрбиелеуге барлық жағдай қарастырылған. Сабаққа қажетті оқу-құралдары, қауіпсіздік талаптарына сай орнатылған жиһаздар мен ойын алаңдары мекеменің басты артықшылығы болып отыр.
Мекемеге 9 тәжірибелі педагог пен маман жұмысқа қабылданып, ауыл тұрғындары үшін жаңа жұмыс орындары ашылды. Бұл өз кезегінде округтің әлеуметтік-экономикалық дамуына оң әсер ететіні сөзсіз.
Жергілікті жұртшылық «Балауса» балабақшасының ашылуын ауыл өміріндегі қуанышты жаңалық ретінде қабылдап, оның талай балаға білім мен тәрбие беретін маңызды орынға айналатынына сенім білдірді.
