Жұмысшы мамандықтар жылы – еңбекті дәріптеу жылы

 2025 жыл елімізде Жұмысшы мамандықтар жылы деп жарияланды. Бұл бастама – еңбек адамдарының мәртебесін арттыру мен олардың қоғамдағы орнын айқындауға бағытталған маңызды қадам. Еңбек – ел экономикасының негізі, ал жұмысшы мамандық иелері – сол тіршіліктің тірегі. Қарапайым еңбек адамдары еліміздің дамуына өз қолымен, маңдай терімен үлес қосып келеді.
Бүгінде дән егіп, жол салып, құрылыс жүргізіп, зауытта, фабрикада еңбек етіп жүрген азаматтардың еңбегі ерекше құрметке лайық. «Еңбек етсең ерінбей, тояды қарның тіленбей» деген дана сөздің мәні осы жылы ерекше айқын сезіледі. Бұл жыл – жастарға жұмысшы мамандықтардың қадірін ұғындырудың таптырмас мүмкіндігі. Мектептер мен колледждерде кәсіби бағдар беру жұмыстары жанданып, еңбекке баулу сабақтарының маңызы арта түсті.
Жұмысшы мамандықтар жылы аясында түрлі байқаулар, форумдар мен көрмелер ұйымдастырылып жатыр. Онда үздік мамандар тәжірибесімен бөлісіп, жас буынды еңбекке баулуда. Еңбек адамына деген құрмет – ел дамуының кепілі. Әрбір табысты өндіріс, әрбір жаңа құрылыс – жұмысшының қолынан туған еңбек жемісі.
Осы жыл арқылы қоғам еңбек қадірін терең сезініп, «еңбек ету – ең абыройлы іс» деген түсінік қалыптасуда. Жұмысшы мамандық иелері – елдің жүрегі мен қуаты. Сол себепті әрқайсымыз еңбекті қадірлеуді, еңбек адамын бағалауды өмірлік ұстанымға айналдыруымыз керек. Еңбек етуші халық – мемлекетіміздің ең басты байлығы.