ЕҢБЕК ЕЛДІҢ ЕРТЕҢІН НЫҒАЙТАДЫ
2025 жыл елімізде «Жұмысшы мамандықтар жылы» болып жарияланды. Бұл бастама – қоғамның нағыз тірегі саналатын еңбек адамдарының мәртебесін көтеруге бағытталған маңызды қадам. Ел дамуының негізгі қозғаушы күші – күн сайын өз ісін адал атқарып жүрген жұмысшы қауым. Құрылысшы, дәнекерлеуші, ұстаз, дәрігер, агроном, механизатор – бәрі де ел игілігі үшін еңбек етуде. Қарапайым еңбектің қадірін арттыру – ұлттың рухани жаңғыруының бір көрінісі.
Мемлекет басшысы өз Жолдауында жұмысшы мамандықтарын дамыту арқылы экономиканың нақты секторын күшейтудің маңызын атап өтті. Бұл бағытта кәсіби білім беру жүйесін жаңғырту, дуалды оқыту тәсілін кеңейту көзделген. Жастарға нақты кәсіпті меңгерудің маңызын ұғындыру – бүгінгі күннің басты талабы. Себебі білікті маман – елдің ертеңі, мемлекеттің тірегі.
Ел бойынша өндіріс орындары мен кәсіптік колледждер арасында тығыз байланыс орнатылып, жас мамандарға тәжірибе алмасу мүмкіндігі берілуде. Жаңа жұмыс орындарының ашылуы да – осы бастаманың нақты нәтижесі. Әрбір еңбек адамының еңбегі еленіп, қоғамда құрметке ие болуы – мемлекет саясатының басым бағыты.
«Жұмысшы мамандықтар жылы» еңбекке деген көзқарасты түбегейлі өзгертуді көздейді. Әр саладағы еңбек иесінің табанды жұмысы – елдің дамуының кепілі. Бүгінгі ұрпақ адал еңбекті қадірлеп, нақты кәсіпке бет бұрса – болашақ берік болмақ. Ендеше, бұл жыл – еңбек адамын дәріптеп, елдің ертеңін нықтайтын жыл болсын!
