Таза Қазақстан – ортақ жауапкершілік
«Таза Қазақстан» – елімізде экологиялық мәдениетті қалыптастыруға бағытталған маңызды жалпыұлттық бастама. Оның негізгі мақсаты – қоршаған ортаны қорғау, елді мекендердің тазалығын сақтау және азаматтардың табиғатқа деген жауапкершілігін арттыру.
Бүгінде бұл бастама аясында еліміздің барлық өңірлерінде сенбіліктер ұйымдастырылып, саябақтар мен көшелер тазартылып, мыңдаған ағаш көшеттері отырғызылуда. Экологиялық шараларға жастар, еріктілер, мемлекеттік мекемелер, кәсіпкерлер және қарапайым тұрғындар белсенді қатысып келеді. Бұл қоғамдағы бірлік пен ортақ жауапкершіліктің жарқын көрінісі.
Тазалық – тек бір күндік акция емес, әр адамның күнделікті өмір салты болуы тиіс. Әрбір азамат қоқысты арнайы орындарға тастап, табиғатты ластамауға, қоғамдық орындарды таза ұстауға және қоршаған ортаға жанашырлықпен қарауға міндетті. Осындай қарапайым әрекеттер еліміздің экологиялық жағдайын жақсартуға үлкен үлес қосады.
«Таза Қазақстан» бастамасы адамдарды табиғатты қорғауға ғана емес, туған жерін құрметтеуге және болашақ ұрпаққа таза әрі жайлы орта қалдыруға үндейді. Табиғатты аялау – әрбір азаматтың парызы. Сондықтан бәріміз осы игі іске белсенді қатысып, Қазақстанымыздың көркеюіне өз үлесімізді қосайық.
