Табиғатқа жанашырлық — елдің бас талабы
Ата-бабамыз аманат еткен ұлан-ғайыр даламыздың тазалығы мен сұлулығы – бүгінгі жаңа қоғамның басты құндылығына айналды. Мемлекет басшысының бастамасымен қолға алынған «Таза Қазақстан» жалпыұлттық бағдарламасы қатардағы науқандық іс-шара шеңберінен шығып, елдіктің, жаңа экологиялық мәдениет пен ұлттық этиканың жарқын көрінісіне айналды. Бұл – тек айналаны тазарту емес, сананы жаңғырту жолы.Табиғат – тіршілік бесігі. Соңғы жылдары Үкіметтің тікелей қолдауымен бұл қозғалыс жаңа деңгейге көтеріліп, әрбір азаматтың конституциялық міндеті ретінде бекітілді. Республика көлемінде атқарылған ауқымды істердің нәтижесі де толайым. Екі жылға жуық уақыт ішінде еліміз бойынша 2 миллион тоннадан астам қалдық тазартылып, дала төсіне 5,5 миллионнан астам жас көшет отырғызылды. Бұл – туған жердің табиғатына жанашырлық танытқан 6,5 миллионнан астам отандасымыздың, соның ішінде 780 мыңнан астам ерікті жастың ерен еңбегінің жемісі.Жаздың алғашқы айында бұл игі іс аймақтарда жаңа қарқынмен жалғасын тапты. Есіл мен Ертістің мөлдір толқындары, Арқа мен Алатаудың баурайы бүгінде жалынды жастар мен ардақты ардагерлердің күшімен тазарып, түрлене түсті. Ең бастысы, бүгінгі таңда тазалыққа заманауи технологиялар мен жасанды интеллект те қызмет етуде. Қалалардағы «ақылды камералар» мен арнайы цифрлық платформалар қоршаған ортаның бүлінбеуін жіті қадағалап отыр.Өркениетті елдің өрісі – тазалығынан көрінеді. «Таза Қазақстан» – туған өлкеміздің ертеңіне, келер ұрпақтың салауатты болашағына жасалған ең үлкен қадам. Сұлулық пен тазалық әр үйдің табалдырығынан, әр адамның жүрегінен басталады.
