Таза Қазақстан: қоғам мен табиғат үндестігі

Таза Қазақстан: қоғам мен табиғат үндестігі

Табиғат пен адамзат – бір-бірімен тығыз байланысты ұғымдар. Қоғамның сапалы дамуы қоршаған ортаның тазалығына, табиғи ресурстардың сақталуына және экологиялық мәдениеттің қалыптасуына тікелей тәуелді. Осы тұрғыдан алғанда «Таза Қазақстан» бастамасы – тек тазалық акциясы ғана емес, қоғам мен табиғат арасындағы үйлесімділікті нығайтатын маңызды қадам.

Бүгінде экологиялық мәселелер жаһандық сипат алды. Қалдықтардың көбеюі, ауаның ластануы, су көздерінің тартылуы – мұның бәрі адам әрекетінің салдары. Сондықтан табиғатты қорғау тек мемлекеттік деңгейдегі шаралармен шектелмеуі тиіс. Әр азамат өзінің күнделікті өмірінде тазалықты сақтауға үлес қосқанда ғана нақты нәтиже болады. Аула тазалау, ағаш отырғызу, қоқысты сұрыптау сияқты қарапайым әрекеттер үлкен өзгеріске бастайды.

Бұл бастаманың тағы бір маңызды қыры – қоғамдық сананы жаңғырту. Тазалық мәдениеті бала кезден қалыптасуы керек. Мектептердегі экосағаттар, еріктілер қозғалысы, сенбіліктер – жастардың табиғатқа жанашыр көзқарасын арттырады. Ортақ іске жұмылған жұрт жауапкершілікті де, бірлікті де терең сезінеді.

Қоғам мен табиғаттың үндестігі – тұрақты дамудың негізі. Таза ортада өмір сүрген халықтың денсаулығы мықты, рухы сергек болады. Сондықтан тазалықты бір реттік науқан емес, күнделікті өмір салтына айналдыру – баршамыздың ортақ міндетіміз.