Жауапкершілікті қоғам жолындағы жасыл бастама
«Таза Қазақстан» акциясы – қоршаған ортаны қорғауға бағытталған кезекті шара ғана емес, бұл – қоғам санасын жаңғыртуды көздейтін маңызды бастама. Табиғатқа деген жанашырлық пен азаматтық жауапкершілікті қатар ұштастырған бұл жоба ел болашағына бейжай қарамайтын әрбір азаматтың ортақ ісіне айналуы тиіс.
Қазіргі таңда экологиялық мәселелер әлемдік деңгейде өзекті болып отыр. Ауаның ластануы, тұрмыстық қалдықтардың көбеюі, су көздерінің тартылуы – мұның бәрі адам әрекетінің салдары. Осындай жағдайда «Таза Қазақстан» акциясы табиғатты қорғау мәдениетін қалыптастыруға бағытталған нақты қадам болып саналады. Сенбіліктер ұйымдастыру, ағаш отырғызу, өзен-көл жағалауларын тазарту, көшелер мен аулаларды ретке келтіру – мұның бәрі қоғамның экологиялық жауапкершілігін арттыруға ықпал етеді.
Бұл бастаманың басты ерекшелігі – оның жалпыхалықтық сипат алуында. Акция аясында мемлекеттік мекемелер, білім беру ұйымдары, кәсіпорындар, еріктілер мен жастар бір мақсатқа жұмылады. Ортақ іске жұмылған жұртшылықтың ынтымағы қоғамдағы бірлік пен жауапкершілік сезімін күшейтеді. Әсіресе жас ұрпақ үшін мұндай шаралардың тәрбиелік маңызы зор. Табиғатты аялау дағдысы бала кезден қалыптасқанда ғана, болашақта экологиялық мәдениеті жоғары ұлт қалыптасады.
Жауапкершілікті қоғам – бұл тек заңға бағынатын емес, қоршаған ортаға жанашырлықпен қарайтын қоғам. Әр адам өз ауласын, өз көшесін, өз өңірін таза ұстауға атсалысқанда ғана ел көлеміндегі тазалыққа қол жеткізуге болады. Тазалық – бір реттік шара емес, ол – күнделікті өмір салтына айналуы керек.
«Таза Қазақстан» – жасыл елге бастар жолдың айқын көрінісі. Бұл бастама табиғатты қорғау арқылы ұлттық сананы жаңғыртуға, ортақ жауапкершілікті арттыруға қызмет етеді. Еліміздің әрбір азаматы осы игі іске үлес қосса, Қазақстанның келбеті көркейіп, болашақ ұрпаққа таза әрі қауіпсіз орта қалдыра аламыз.
